Listkennslusprotar

Oft má finna spennandi efnivið á kassasvæði stórmarkaðanna. Þetta er tilvalið að nýta sér enda skemmtilegt að nota fjölbreyttan efnivið til listsköpunar og finna til eitthvað sem ekki er nýtt á hverjum degi. Hér má til dæmis sjá bylgjóttan pappa undan ávöxtum. Í þetta verkefni þarf einn slíkan pappa og úr honum eiga nemendur að útbúa brjóstmynd af sjálfum sér.

Nemendur fá pappann til að handleika og velta fyrir sér möguleikum hvað snertir útfærslu á verkefninu. Því næst skissa þeir nokkrar hugmyndir að sjálfsmynd á skissublöðin, velja svo eina hugmynd og útfæra hana á pappann sjálfan, fyrst með blýanti og svo með akrýlmálningu eins og við á.

​

Um leið og verkið er þornað má hengja það upp. Gaman væri svo að fá nemendur til að giska á hvaða nemandi eigi hvaða mynd.